اخر قصيدة للشاعر المبدع عبد الحسين الحلفي

طكَـ كَـلبي عليك وجيت اشوفك
على بختك تكَـلي شعندك وجاي
والله حتى هالكلمة حلوة منك
واتمنى علية تعيدهة هواي

لذالك حتى انة اسمعهة اكثر
...راح ابقة علة بابك رايح وجاي
اشما تصعب علي صدكَـني ارتاح
اريدنك صعب لاتسهل وياي
يجوز بهاي ايدي الزم سباع
بس تخوني من الزم الماي
على بختك شنو السويته وياك
عفت ناسي وخذيتك عوض ناسي
احبك ما احس اكرهك فد يوم
واذا حسيت هم اكره احساسي
يذكروني بعذابي الشفتة وياك
واذكر واكلهم والله ناسي
كلش قاسي وبالذات وياي
واكَـول وياي بس انتة مو قاسي
وكَـفت انتة علة راسي بجدم سكران
وتريد اتطيح ويعدلّك راسي
بحبك تختلف حتى القياسات
صفر حبك كسر رقمة القياسي
ومدري شبية اشمك وانتة عاكَـول
وغيرك ما اشمة وهوة قداح
واحس نغزاتك رماح وية الانفاس
واكول افيش وانة اتنفس ارماح
اذا ماتسمع صياحي الخلل بيك
اليصيح احسن من المايسمع صياح
واذا انة طحت صدكَـني ماضوج
الوكَـفتة طولت بالطيحة يرتاح
بس خلي ابالك ياضوة العين
الاصيل تروح روحة لو محب راح
المرجوحة الاصيلة تكَـطع حبال
اذا بالعيد من عدهة طفل طاح

قصيدة كولش حلوة عاشت ايدك